Konsumidó Alertá Volumen 23, febrüari 2016 - Page 13

Bo derechi riba konformidat di produkto

Bo tin derechi riba un produkto ku ta funshoná manera ku bo a spera. Den lei ta pará ku e produkto mester ta konforme na loke bo a spera ora bo a kumpr’é. Bo mester por usa e produkto na un manera normal pa un periodo definí. Loke bo por spera di e produkto ta dependé di e siguiente puntonan:

- Loke e bendedó a bisa bo

- Loke a keda bisá den e propaganda pa bende e

produkto

- E marka

- E preis

- I si e produkto ta nobo òf segunda mano

Kon largu un produkto mester bai ku bo?

Bida di un produkto ta dependé di e tipo di produkto. Un wasmashin lo mester bai ku bo mas largu ku un mp3-player. Ta konsehabel pa, di antemano, puntra e bendedó kon largu e produkto lo keda traha. Bo por hasi e pregunta aki tambe na e fabrikante di e produkto.

Na ki momentu un produkto no ta konforme?

Un produkto no ta kumpli ku bo ekspektativa ora e produkto no ta funshoná bon. Esaki no ta nifiká ku kada problema ta hasi un produkto defektuoso. Si a base di uso intensivo e produkto a gasta, por ehèmpel, e no ta defektuoso. Esei ta kos ku ta pasa. Un outo, por ehèmpel, mester di mantenshon. Esaki tambe ta bálido pa sierto aparatonan elektróniko, manera un mashin di èsprèso. Abo a usa e produkto robes, òf no a hasi mantenshon, òf a daña òf kibra e produkto bo mes? I e produkto a kibra? Den kasonan asina, abo mes mester paga pa reparashon.

Ehèmpel

Bo a kumpra un frishidèr. Despues di algun aña un lus den e frishidèr ta daña. Esaki ta un reparashon ku abo mes mester (laga) hasi. Pero si e kòmprèser daña despues di dos aña, e ora ei si bo por reklamá e bendedó.

Kiko ta bo derechinan ora e produkto ta defektuoso?

Si e produkto ta defektuoso, bo tin derechi riba reparashon grátis, un otro produkto meskos òf bo sèn bèk, den e sekuensia menshoná. Esaki mester pasa den un tempu rasonabel i sin ku abo tin ku pasa masha molèster. E bendedó por sòru pa fia bo un otro produkto pa e tempu di reparashon. Bo no tin derechi riba bo sèn bèk den promé instansia. E bendedó tin e derechi pa purba di drecha e produkto òf ofresé bo un otro produkto meskos promé ku e duna bo bo sèn bèk.

E produkto a kibra den e promé 6 lunanan? Òf tin algu robes ku e produkto den e promé 6 lunanan? E ora ei lei ta protehá abo konsumidó i obligá e bendedó pa demostrá i prueba si e ta kere ku ta bo falta ku e produkto a daña òf kibra. Si e produkto daña despues di e promé 6 lunanan, e deber pa prueba ku no ta bo falta ta kai bou di bo. Si bo a usa e produkto di forma normal i el a gasta? Òf abo a usa e produkto robes? E ora ei abo mes mester paga e reparashon i bo no tin garantia riba reparashon grátis òf un produkto nobo.

E bendedó ta obligá pa solushoná e problema òf tuma kontakto ku e fabrikante. Tin biaha bo problema por keda solushoná mas lihé si bo mes tuma kontakto ku e fabrikante. Por ehèmpel si e bendedó tin palabrashonnan ku e fabrikante. E bendedó por konsehá bo pa abo tuma kontakto direkto ku e fabrikante. Bo no ta obligá di hasi esaki! E bendedó ta keda responsabel pa e reparashon. Abo por skohe pa tuma kontakto ku e fabrikante. Den e kaso aki mèldu esaki na e bendedó.

Bo no mester paga nada èkstra pa reparashon òf un otro produkto. Si e bendedó ke obligá bo di hasi esaki, bo por disolvé e kontrato di kompra. Pa esaki bo por usa e karta di ehèmpel.

Voorbeeldbrief - Niet akkoord bijbetalen bij reparatie ondeugdelijk product

Fundashon pa Konsumidó ku regularidat ta haña preguntanan tokante garantia di un konsumidó ora e kumpra un produkto. Den e artíkulo aki nos ke splika kiko ta garantia i e diferente formanan di garantia ku ta eksistí. Na promé lugá tin e asina yamá garantia pa lei (wettelijke garantie) ku ta duna bo derechi riba un produkto ku ta konforme loke abo a spera na momentu di a kumpra e produkto. Banda di esaki tambe ta eksistí garantia di fábrika i garantia èkstra ku bo por kumpra. Nos lo splika promé kiko ta garantia pa lei i despues nos lo trata garantia di benta, di fábrika i esun ku bo por kumpra èkstra.

Lo kontinuá ...