Konsumidó Alertá Volumen 1, novèmber 2013 - Page 3

Konsumidó Alertá

PRÓLOGO

Marc Marshall

Direktor Fundashon pa Konsumidó

PRÓLOGO

Awendia kada telefon selular ta un kòmpiuter riba su mes. Nos por manda email, sùrf riba Internèt, i hasi uso di aplikashonnan ku ta trahá pa haña akseso na bo kuenta di banko òf bo korant preferí. Práktikamente tur kos bo por hasi ku un telefòn òf tèblèt. Ademas ku e popularidat enorme di medionan social manera Facebook nos ta kere ku promoshon via internèt i medionan sosial ta e futuro forma pa komuniká i informá.

Aktuando riba esaki Fundashon pa Konsumidó ta lansa su promé edishon digital di nos revista Konsumidó Alertá. Ku un edishon digital di nos revista Konsumidó Alertá nos ke trata di un manera fásil, lihé i aksesibel pa duna abo konsumidó e informashonnan ku nos ke parti kubo via e medio digital nos por saka e revista riba un frekuensia mas haltu i ku mas espasio pa duna informashon mas profundo di temanan ku nos ke kompartí ku nos konsumidónan.

DIGITAL

Nos intenshon ta pa kada luna saka un edishon nobo ku tópikonan aktual manera kehonan ku nos a trata, leinan ku mester kambia i keda drechá na bo benefisio. Banda di esaki nos ke kompartí nos logronan i tambe plannan ku Fundashon pa Konsumidó tin pa futuro serkano. Banda di esaki nos lo duna atenshon na nos plan di konsientisashon di konsumidó i tambe lo trata temanan sosial i di salú. Videonan informativo, lenknan na artíkulonan mas amplio ta duna e revista un dimenshon èkstra. Konsumidó Alertá Digital lo ta e plataforma interaktivo kaminda nos por kompartí ainda mas informashon i tambe tende di abo konsumidó kiko ta bo deseo i prekupashonnan. Pa asina nos logra e meta di Fundashon pa Konsumidó ku ta yega na konsumidónan krítiko i konsiente di nan poder di kompra.

Konsumidónan interesá pa risibí e edishon digital di nos revista por manda un email pa info@fundashonpakonsumido.org òf tuma kontakto via nos wèpsait www.fundashonpakonsumido.org. Suskribí ku bo adrès di email i risibí bo revista digital outomátikamente den bo mailbox.