Տերյան փողոցի առաջին խաչմերուկից թեքվելով աջ կհասնեք Աճեմյան փողոց։ Քաղաքի այս հատվածում մի մեծահասակ կնոջ հանդիպեցինք, ով հրաժարվեց նշել իր անունն ու լուսանկարվել, բայց սիրով պատմեց մեզ իր տան պատմությունը:
Պարզվում է, որ այս տանն է նկարահանվել «Հին օրերի երգը» ֆիլմից մի հատված։ Տունը պատկանել է Յուզբաշով անունով մի հարուստ առևտրականի, ում որդուց էլ իր ամուսնու պապը գնել է այդ տունը։
«Ես պահպանել եմ այս տունը, թոռներիս ու որդուս էլ խնդրել եմ, որ պահպանեն այս ամենը, չէ որ մեր հին Գյումրուց մնացած հարստություններից մեկն է», նշեց նա:
Տան մյուս մասը հիմա մեկ այլ մարդու է պատկանում, բայց տիկինն ուրախ է, որ բակն ու նկուղը մնացել են իր հատվածում: Ի դեպ, տան նկուղը պատկանել է Կումայրի արգելոց թանգարանին և մինչև օրս էլ այնտեղ պահվում են կարպետներ ու էլի շատ ու շատ հին իրեր:
Փողոցի բնակիչներից նաև իմացանք, որ հնում այստեղ ապրել են միայն ազգությամբ ռուսները, իսկ փողոցի ծայրամասում ռուս զինվորների հանրակացարանն է եղել: