FAK-nuus
Kultuurleiers tydens historiese
FAK Prestige-aand vereer
Presies 500 jaar gelede op 31 Oktober 1517 het die Duitse monnik,
Martin Luther, sy 95 stellings teen die kerkdeur van Wittenberg-katedraal
vasgespyker en met elke hamerslag is die aanvang van die Protestantse
Reformasie luid aangekondig.
D
ié geskiedkundige gebeurtenis
se enorme impak op die
Westerse kultuur word vandag
steeds ervaar en op 31 Oktober 2017
het die FAK tydens die jaarlikse
Prestige-aand vier uitsonderlike
kultuurleiers vereer vir hul besondere
bydrae tot Afrikaans en
Afrikanerkultuur.
Die aand was weereens 'n luisterryke
geleentheid wat ingewy is met pragtige
orrelspel terwyl die kerkklokke van die
NG Kerk Lyttelton moedergemeente in
die agtergrond beier. Die sangtalent
van Liezel Pieters en Chris Chameleon
het gaste betower en opnuut laat besef
hoe bevoorreg ons is om wêreldklas
Afrikaanse sangtalent op ons
voorstoep te kan geniet.
Die FAK word getrou finansieel
ondersteun deur 'Vriende' wat
maandeliks bydraes lewer en daar
word soms gewonder hoe hierdie
bydraes aangewend word. Vanjaar is
daar tydens die Prestige-aand 'n video
vertoon wat kortliks die hoogtepunte
van die FAK se bedrywighede ten toon
gestel het. Ieder en elk van die gaste
het na afloop van die geleentheid net
weereens bevestig hoe trots hulle
daarop is om te weet dat hulle deur hul
getroue ondersteuning die FAK help
om geld om te skakel in kulturele
kapitaal, wat bydra tot die toekoms van
ons taal, kultuur en geskiedenis.
Die FAK het vanjaar vier persone vereer
vir die merkwaardige bydraes wat
elkeen van hulle op hul onderskeie
gebied gelewer het tot die bevordering
van die Afrikaanse taal en
Afrikanerkultuur. Die ontvangers was:
• Mnr. Flip Buys:
FAK Prestige-toekenning vir
uitnemende leierskap;
• Prof. Abraham H. De Vries:
NP van Wyk Louw Toekenning vir
die bevordering van Afrikaanse
taal en kultuur;
• Prof. Irma Eloff:
HB en MJ Thom Prestige-
toekenning vir die bevordering
van Afrikaanse onderwys en
opleiding; en
• Me. Johanna van Eeden:
FAK Prestige-toekenning vir die
bevordering van Afrikaans in die
media.
Die aand is tradisioneel afgesluit met 'n
gesellige saamkuier op die grasperke
buite die kerkgebou waar gaste in
vervoering was oor die liggies, kerse,
wyn en heerlike eetgoedjies wat bedien
is. Na afloop van die spoggeleentheid
was almal dit eens: die FAK is dié
kultuurorganisasie waar jy waarlik in
hart en siel, tuis kan voel.
18
Die Afrikaanse TAALSKRIF