E-Vespertino Edicion 27 di September 2013

Awe cu e Business Plan di ATA Sui Generis cu a leak ta duna mi tur rason pa loke mi ta bin ta cuestionando Minister di Turismo desde aña pasa! Desde aña pasa mi tabata bin ta cuestionando cu nos turismo no ta bayendo bon y mas ainda mi tabata cuestiona Minister di Turismo, Otmar Oduber di su mal maneho. Ta cuanto biaha mi tabata cuestion’e riba caida drastico di nos turismo di cual ta wordo sinti door di nos mesun hendenan trahando den Turismo. Cada biaha mi tabata menciona cu si mi tin un negoshi y 100 hende a drenta den mi negoshi sinembargo ta 3 so a cumpra, e 100 no ta importante sino e 3 cu a cumpra. Mientras cu nos Minister di Turismo tabata trece manipulacionnan di mentira pa 4 aña cu nos turismo ta den su mihor fase, awe e berdad a sali. Riba e mesun peticion di e Minister encuestion a duna permiso pa un Mericano haci un estudio pa loke ta trata un “Strategic Business Plan” di cual a sali fatal pa e Minister di Turismo. Tur e informacionnan aki den e analisis ta basa riba empresarionan, ehecutivonan y trahadornan den Turismo aki na Aruba. Segun e Analisis di turismo en general: Aki tin di bisa cu segun e mesun accionistanan a declara den e analisis aki cu nos turistanan ta gastando menos placa y no ta turistanan di calidad manera den e añanan anterior. Gobernacion: ATA Sui Generis no ta suficiente independiente di Minister di Turismo pa por carga e maneho independientemente di politica. Maneho di ATA Sui Generis: Pa e mesun situacion cu ATA ta wordo maneha pa Minister di Turismo den un forma sin pia ni cabes, ATA Sui Generis no ta suficiente fuerte pa cu e maneho en general riba su mes. Mercadeo General: Na e momento aki Aruba y maneho di nos turismo ta pega den añanan di 1980/1990 cu e mercadeo tradicional. Esakinan ta simplemente djis un parti di loke ta trata e analisis y ta mucho pa menciona y ta tristo pa bisa cu nada, pero nada a sali positivo den e analisis aki pa e Minister di Turismo, Otmar Oduber. E mensahe ta bay pa tur esnan cu ta trahando den nos industria di turismo manera nos taxistanan, hoteleronan, restaurantnan, car rentalnan, companianan di tour etc, cu danki na e mal maneho di Otmar Oduber, por spera golpinan duro cu ta biniendo den nos direccion manera: Aruba ta perdiendo turistanan di calidad, nos lo bay sinti un caida drastico di 1894 turista for di Merca y 9386 for di Canada pa e temporada di invierno, esta October 2013 pa April 2014 cu ta Aruba su high season, lo bay tin un caida grandi riba bishitanan di nos crucero manera Princess cu 30 calls menos, RCCL 25 calls menos, HAL 14 calls menos, esakinan ta total 69 yamada di crucero. Riba dje den Otmar Oduber su plan ta poni cu mas medida riba nos turistanan lo wordo implementa. Awe mi ta haña rason y danki na e propio Minister aki cu a traha su mes un trampa y a kere cu nunca e analisis aki lo no yega cerca nos. Mi mensahe final ta, por bringa cu mi, por menasa mi, por horta mi pero hamas por cera mi boca y pesey mi ta y mi lo keda e Voz Di Nos Pueblo! E-Verspectivo.com 11

E-Vespertino Edicion 27 di September 2013 | Page 11