E-Vespertino Edicion 20 di Septerber 2013 | Page 10

Minister Arthur Dowers ta pone fondonan disponibel pa UA pa haci investigacion riba tereno di enseñansa
ORANJESTAD: Na e apertura di e aña academico nobo, Minister di Husticia y Enseñansa mr drs Arthur Dowers a felicita Universidad di Aruba cu su 25 aña di existencia y a pidi pa mas programanan specifico cu ta contribui na e desaroyo di areanan specifico den nos sociedad. E mandatario a pidi tambe pa investigacionnan riba tereno di enseñansa, cual ta encera entre otro un investigacion riba tereno di resultadonan den enseñansa y un investigacion tocante e desaroyo di personanan cu ta traha den enseñansa. 10 Pa cu e dos investigacionnan aki Minister Dowers a bisa cu lo pone fondonan disponibel. Minister Arthur Dowers a subraya cu Universidad di Aruba ta un institucion hopi importante den nos comunidad como un institucion cu ta contribui na e desaroyo social di nos nacion. E rol di Universidad di Aruba ta esencial, como un instancia cu ta contribui cu diferente investigacion y desaroyo academico, entre otro, segun Minister Dowers. Minister Dowers kende a expresa den su prome discurso como mandatario na Universidad di Aruba cuatro aña pasa, cu mester aumenta e inversion den scolnan basico y kleuterschool, a splica cu fortificando e fundeshi di enseñansa lo percura pa mas studiante yega na e nivel universitario. Asina ta contribui na desaroya di mas studiante pa Universidad di Aruba y ta provee crecemento di e institucion importante aki y lo presenta mas oportunidad pa expansion di e facultadnan di UA. E diferente investigacionnan cu el a boga pa Universidad di Aruba haci tin un relacion cu e desaroyo aki y lo mester duna un indicacion di unda Aruba ta para y si desaroyonan den enseñansa ta dunando e resultadonan desea. Ademas Minister Dowers a boga pa Universidad di Aruba asumi e rol di liderazgo pa cu e programa di maneho pa lidernan den enseñansa (leadership in education) ofreci pa Harvard University y pa duna continuidad na su desaroyo na Aruba. E prome paso pa cu e programa aki a tuma luga caba bao maneho di Minister Dowers cu diferente seminario pa lidernan den enseñansa, ofreci na Aruba pa Professor James Honan di Harvard University. Finalisando, e titular di husticia y enseñansa, kende ta un alumnus di e Facultad di Ley di Universidad di Aruba, a gradici tur persona cu ta contribuyendo of a contribui na e universidad di un forma of otro durante su 25 aña di existencia. Tambe el a pidi pa apoyo y sosten pa UA di parti di personanan cu a disfruta di e oportunidad pa studia y adkiri nan diploma na e institucion aki.

E-Vespertino.com