Les Inkonus - Twa
Se enn konsentre lamitie kinn melanz ar diferan sonorite pou amen enn ler fre dan zorey, ek enn saler dan leker. Gagn bon pou ekute. Mersi Les Inkonus ! Mersi pou letan ki zot inn pase pou ekrir zot tex ek lamizik, aranz sak morso, pou ki zot vinn propoz nou enn album, ki vo lapenn ekute ek aste. (Monn aste #Twa)
Premie dabor seki resorti se enn larmoni ki ekziste lor zot bann konpozision. Larmoni vokal, lamizik kot sakenn ena so plas san deborde, ni eklate. Tou konpozan group-la resorti kan zot zwe, nou tann zot tou. Zot inison ritmik osi enn pwin for lor zot bann konpozision. Andeor tou sa laspe teknik-la, zot vinn sirtou expoz lazwa ki ena kan to partaz enn lamitie, ou mem pli profon enn fraternite mizikal. Sa santiman-la mo resenti li lor tit Inkonus kot zot dekrir sak mam zot group.
Santer - Bernard Moonsamy, Lucas Cupidon ek Lionnel Cupidon
Gitaris - Olivier Frappier ek Patrice Arthur
Basis - Loïc Cupidon
Pianis - Yann Payet
Bater/Perkision - Jeremy Gungadoo et Dario Ramdeal
Enn bann zenn ki vinn koz lor bann tem kouma lamour, latirans, lamitie ek la fam a traver Mama. Dayer sa tit-la mo prefere, parski mo santi dan lavwa santer prinsipal enn vibrasion extra, li pe sant ar so leker ek li transmet enn lemosion for kan bann premie mo sone.
Antouka sa album-la fer mwa voyaze, mo mari kontan kan mo tann tou sa bann inflians ki Les Inkonus in reisi melanze pou amenn enn prodwi parey, enn idantite mizikal. Sel regre seki mo pann ankor zwen zot lor enn live. Si dan istidio zot pe reisi avoy enn bann vibrasion parey, mo dimann mwa pou enn live kouma sa ete…
Mo invit Twa al ekut bann Inkonus... ena bon groove ladan!
46
www.AudationMagazine.com