Adv. Kobus Engelbrecht
Sanlam Besigheidsmark
W
anneer ‘n mens jou testament opstel is
dit belangrik om ondubbelsinnige
woorde te gebruik. Iets wat nou baie
eenvoudig en ongekompliseerd voorkom
kan later ‘n groot probleem veroorsaak. Ek gaan voorafgaande stelling met die volgende praktiese voorbeeld
toelig: Gestel ‘n boer besit onder andere ‘n plaas en ‘n
woonhuis op die naaste dorp. Hy bemaak die plaas aan
sy seun en die woonhuis aan sy dogter. Omdat daar ‘n
groot verskil in die waarde van die plaas en die woonhuis is en hy sy kinders gelykop wil laat erf, bemaak hy
ook ‘n bedrag geld aan sy dogter. Die woonhuis word
in die testament bloot as “my woonhuis” beskryf.
Nadat die boer sy testament opgestel het, koop hy ‘n
huis in ‘n kusdorp. Die gesin gebruik hierdie huis gedurende vakansies. Die boer pas nie sy testament aan om
hierdie laasgenoemde huis spesifiek aan iemand te bemaak nie. Regtens val dié huis nou in die restant van sy
boedel. Die boer tree af en hy gaan woon in die huis by
die see. Nou kom die boer te sterwe. Die vraag is nou:
watter een van hierdie twee huise is sy woonhuis?
Watter huis moet die dogter erf? Die potensiaal vir kon
-flik is nou baie groot, want, gestel die dogter neem die
standpunt in dat die huis op die kusdorp haar pa se
woonhuis was aangesien hy die laaste ruk van sy lewe
daar gewoon het, en die seun sê nee, die woonhuis is
die huis op die dorp aangesien dit die enigste woonhuis was wat hulle pa besit het toe hy sy testament laat
opstel het. So ‘n geskil kan uiteindelik in die hof beland
met die gevolglike koste daaraan verbonde, sowel as
die onenigheid wat dit in die familie kan veroorsaak.
Die oplossing om hierdie probleem te voorkom is om
die ligging van die woonhuis in jou testament te beskryf. Byvoorbeeld, “Ek bemaak my woonhuis geleë te
Leliestraat 2, Cradock aan my dogter”. Op hierdie wyse
word enige twyfel uit die weg geruim. Onthou ook om
jou testament aan te pas as jy ‘n woonhuis verkoop en
‘n ander een koop. Gestel nou jy bemaak jou woonhuis aan jou dogter en jy omskryf dit baie spesifiek.
Nou verkoop jy hierdie huis en koop ‘n ander huis,
maar jy pas nie jou testament aan nie. In jou testament word dus ‘n woonhuis wat jy nie meer besit nie
aan jou dogter bemaak. Nou ontstaan daar ‘n vraag
oor jou bedoeling. Het jy bedoel dat jou dogter die
woonhuis wat jy in die plek van die eerste een gekoop
het moet erf of nie? Weereens ontstaan die moontlikheid van konflik en die gepaardgaande koste. Wysig
jou testament dus wanneer jy bates koop en verkoop.
Motorvoertuie en meubels kan baie maklik ook die
bron van dubbelsinnigheid en konflik wees. Net so ook
aandele. Die boer het byvoorbeeld ‘n aantal Sanlamaandele besit in die stadium toe hy sy testament opgestel het. Hy bemaak nou in sy testament as volg: “Ek
bemaak al my aandele aan my seun Jan.” Wanneer die
boer sterf, besit hy egter ‘n uitgebreide aandeleportefeulje. Wat was sy bedoeling? Moet Jan net die
Sanlam-aandele erf óf alle aandele? Weereens ‘n
potensiële bron van konflik.
Die bemaking van kontant kan ook ‘n moontlike uitlegprobleem skep. Gestel die boer bemaak as volg in sy
testament: “Ek bemaak al my kontant aan my vrou”.
Wat presies bedoel hy hiermee? Die kontant in sy
beursie, die kontant in sy kluis, die saldo van sy tjekrekening, spaarrekening, geldmarkrekening of wat?
Deur eenvoudig te sê “Ek bemaak R100 000 aan my
vrou” en daarvoor voorsiening te maak, sal al hierdie
onsekerhede uit die weg geruim word.
Om te verseker dat jou nalatenskap werklik jou wense
weerspieël, is dit belangrik dat jou boedelbeplanning
en die opstel van jou testament met groot sorg
gehanteer word.
Telefoon: 0860100539
Epos: [email protected]
Web:www.sanlamsme.co.za