Artikel deur Hans Lombard
‘n Unieke revolusionêre agt-ry presisie tegnologies
gevorderde planter – die eerste in sy soort in SuidAfrika – is deur Monsanto ingevoer om mielieproewe
vinniger en akkurater te plant om opbrengste te
verhoog en beter gehalte data te verkry.
Die projek is in Februarie 2011 geïnisieer en finaal in
Augustus 2014 geïmplementeer met die aflewering van
die planter.
Die Almaco planter beskik oor gesofistikeerde
ingenieurswese eienskappe en spog met van die wêreld
se voorste planter tegnologie. ‘n John Deere 8245R
trekker met outomatiese stuurfasiliteit is ook aangeskaf
om die planter te hanteer.
Die planter kan geprogrammeer word vir die hantering
van plantestand/ha, tempo van bemestingtoediening,
lengte van plotte en rywydtes.
“Plantestand/ha kan met die plant verander word van
20 000p/ha na 130 000p/ha. Kunsmisbakke word
elektronies beheer om te verseker dat elke plantjie
dieselfde hoeveelheid kry. Tot vier verskillende
applikasies kan in een eksperimentele plot gehanteer
word indien nodig,” sê mnr Mauritz Lombaard,
toetsoperasionele-bestuurder van die mielietelingspan
van Monsanto.
Eksperimentele plotte van verskeie lengtes word in
rywydtes van 75cm, 91cm, 1.5m of 2.3m geplant,
afhangende van die presipitasievlakke van die betrokke
area. Die planter word deur twee persone beman wat
bo-op die planter in stoele sit. Hulle voer die plantbuise
met vooraf-verpakte saad in koeverte wat verskillende
eksperimentele basters bevat.
Elke plot word volgens GPS-koördinate gekarteer. Dit
word gestroop met spesiale omgeboude New Holland
stropers om opbrengsdata te versamel.
Proewe word in vyf provinsies deur geskoolde
toetsspanne geplant – Gauteng, Vrystaat,
Mpumalanga, Noord-Wes en Noord-Kaap.
Alle proewe word op grond geplant wat van
kommersiële boere gehuur word. Boere speel ‘n kritieke
rol in die gehalte van die proewe. Proewe word
aangepas volgens die boer se praktyke,
bemestingaanbevelings, insek- en
onkruidbeheermaatreëls.
Vir meer inligting skakel Mauritz Lombaard 082 447
2337.