Riaan Wassung, keldermeester van
die Universiteit Stellenbosch se
Welgevallen Kelder, beskryf Chenin
Blanc as ‘n gemaklike, vars drinkwyn. Vir sy volgende Die Laan-reeks
beplan hy ‘n voller, ryper styl. Hy
verduidelik dat die eindproduk alles
afhang van watter styl van voorbereiding ‘n wynmaker gebruik, en of
die wyn enige hout- of gismoerkontak gehad het.
Welgevallen Kelder se eie Die Laan
Chenin Blanc is afkomstig van
wingerde van by die drie dekades
oud op die Bottelarypad naby
Stellenbosch. Dit word teen sowat
R50 per bottel verkoop.
Daar is egter ‘n Chenin Blanc of
twee wat jou sak behoorlik sal
skud, omdat hulle afkomstig is van
sogenaamde “Old Vines” wingerde
wat al aansienlik meer jare in die
grond is. Neem byvoorbeeld
“Mevrou Kirsten” wat deel is van
Eben Sadie se Die Ouwingerdreeks. Die verkoopsprys daarvan is
digby R700. Dit word gemaak van
druiwe uit 110-jaar oue wingerde,
geleë aan die voet van Stellenbosch se Botmaskop. Dis vernoem
na die eienaar van die stuk grond
waarop dit verbou word, mev
Anna Kirsten. Sy is vroeër vanjaar
op die ouderdom van 90 jaar oorlede, maar haar naam sal voortleef
op die etikette van een van die
mees gesogte “Old Vines” Chenin
Blancs wat plaaslike te koop is.
Goed oor die 40% van Chenin
Blanc-wingerde in Suid-Afrika is
glo ouer as 20 jaar oud. Van die
werklik besonderse “bejaardes”
word gelys op Rosa Kruger se
webblad “I am Old”
(www.iamold.co.za). Dit dui al wat
wingerd ouer as 35 jaar oud in
Suid-Afrika aan, insluitend sultanadruiwe.
Daar’s ‘n spesifieke skaarsheidswaarde én romantiek verbonde
aan wyne wat van sulke ou
wingerde kom. Party mense sweer
dat hierdie wyne werklik spesiale
kwaliteite inhou, maar ander
kenners reken dis blote bemarkingsfoefies.
Juis omdat almal in die bedryf nie
saamstem daaroor nie, word navorsing daaroor deur ‘n MScstudent in Wynbiotegnologie aan
die Universiteit Stellenbosch, Renée
Crous, gedoen. Sy hoop om te kan
vasstel of daardie “iets spesiaals”
op werklikheid of op verbeelding
gebou is, en of mens dit uiteindelik
chemies kan analiseer en uitwys.
Sy is tans besig met die chemiese
en sensoriese analise van veral die
mondgevoel van tien Chenin Blancs
afkomstig uit wingerde wat minstens 40 jaar oud is. Dis ‘n tydsame
proses, want ‘n sensoriese profiel
oor presies hoe dit proe, ruik en lyk
is nog nooit voorheen vir enige
Suid-Afrikaanse “Old Vines” Chenin
Blanc-wyne saamgestel nie. Mondgevoel, so vertel Renée, behels
dikwels moeilike konsepte en dis
ingewikkeld om ‘n paneel mense op
te lei om dit te analiseer. Sy spandeer ook heelwat tyd in die laboratorium om die chemiese samestelling en inhoud van dié tienstuks
wyne vas te stel, asook watter
chemiese komponente juis vir die
spesifieke mondgevoel-aspekte van
die “Old Vines”-wyne verantwoordelik is.
Haar navorsing word deur die
Chenin Blanc Vereniging ondersteun. Haar studieleier is dr Hélène
Nieuwoudt van die Universiteit
Stellenbosch se Departement
Wingerd- en Wynkunde.
Om Die Laan Chenin Blanc te bestel,
kontak Riaan Wassung
([email protected]) of besoek
die Facebook blad “Die Laan
Wines”.