Artikel deur Jacques Jansen van Vuuren,
Tegniese Bestuurder, RCL FOODS
D
it is veral in vandag se
tyd belangrik om die
natuurlike hulpbronne
wat op jou plaas tot jou
beskikking is, ten volle te benut
sonder om dit agteruit te laat gaan.
Dit kan gedoen word deur met
skaap en bees te boer. Nie net sal
hierdie praktyk jou weidings beter
benut nie, maar dit sal ook jou
risiko verdeel tussen selfs drie
markte, naamlik beesvleis, skaapvleis en wol. ‘n Ekstra bonus is dat
veral die skape se parasietlading tot
‘n mate beheer kan word.
Meeste weidingstelsels laat toe dat
daar kampe vir ‘n sekere tydperk
gerus word, wat beteken dat die
gras redelik hoog gaan uitgroei
voordat dit benut gaan word.
Skape hou nie daarvan om in lang
gras te wei nie, dus sal dit dan
beter wees om jou beeste eers in
daardie kampe in te jaag. Sodra die
hoogte van die gras daardie kampe
+/- 250mm is, kan die skape ingejaag word Die skape sal die gras
nou bewei en as die weiding so
50mm hoog staan, kan die skape
onttrek word om na ‘n nuwe kamp
te gaan. Beeste verkies gras wat
langer is, dus kan beeste ingejaag
word as gras te lank is vir skape om
te wei en dan weer onttrek word as
die gras op die skaap se weilengte
is, waarna die skape ingejaag kan
word. Die beeste word nou weer na
‘n kamp met langer weidings geskuif om dit weer korter te vreet vir
die skape wat volg.
Waar kampe saam deur skape en
beeste bewei word, moet daar aandag gegee word aan die tipe lek
wat verskaf word. Sekere lekke is
net vir beeste, sekere lekke slegs vir
skape en ander vir beide skaap en
bees. Dit is heel maklik om beeste
van ‘n skaaplek af weg te hou,
maar nie om skape van beeslek af
weg te hou nie. Dit word dus aanbeveel om beeste wat slegs op ‘n
beeslek is, apart in ‘n kamp te hou.
Skaaplek kan binne ‘n tipe kruiphok
geplaas word, waar slegs die skape
kan deurpas en dus sal net die
skape toegang hê tot die lek.
Beeste is grootliks onselektiewe
vreters wat beteken dat hulle die
kampe meer eweredig bewei as
skape. Dit hou die onsmaaklike
grasse tot ‘n mate onder beheer.
Skape is weer meer selektief, en as
hulle vir te lang periodes in ‘n kamp
gehou word, is daar die gevaar dat
sekere dele oorbewei gaan word
(smaaklike grasse) en ander areas
onderbewei (onsmaaklike grasse).
As dit moontlik is, kan kampe opgedeel word in smaaklike en onsmaaklike grasse om sodoende
veral skape te dwing om die minder
smaaklike grasse te vreet.