Melkpoeding met marsepein
en vanielje
Resepte: Arina du Plessis
Foto’s: Neville Lockhart
MMmmmmmm....melk
Melk is een van die natuur se wonderkosse. Heerlik en heilsaam net so op sy eie, maar ook die
beginpunt van alle ander suiwelprodukte soos botter, kaas en roomys. En onontbeerlik in elke kombuis,
want met melk maak jy die lekkerste kos – koesterkos soos melktert en melkkos, delikate nagereg en
gebak, maar ook vinnige maaltye. Kom loer in by Agri-Expo Livestock 2014 en ervaar melk van die
speen tot die spens. In die Woolworths Suiwelspens gaan kundiges jou handige wenke tydens
vermaaklike demonstrasiesessies gee.
Melkjellie is ʼn ligte nagereg, net reg vir hierdie tyd van die jaar. Die sagte geure van amandel, heuning
en vanielje pas perfek by die delikate tekstuur van die jellie. Sit dit voor met vrugte wat in ʼn ligte stroop
geprut of in die oond gebak is – ek het gedroogte appelkose en vars appelliefies in ʼn bietjie heuning
en water geprut tot stroperig.
1 liter volroommelk
1 vanieljepeul, middeldeur gesny en uitgeskraap
15-20 ml gelatien
30 ml koue water
125 ml heuning
30 ml fyn gekrummelde marsepein
Verhit die melk en vanieljesaadjies tot net onder
kookpunt. Sprinkel intussen die gelatien oor die
koue water en laat staan tot al die water
geabsorbeer is. Verwyder die melk van die
stoofplaat en voeg die gelatienmengsel by. Klits
liggies met ʼn draadklitser tot opgelos. Roer die
heuning en gerasperde marsepein by, tot die
marsepein opgelos is. Giet die mengsel deur ʼn sif
(om enige stukkies onopgeloste marsepein op te
vang) in ʼn gesmeerde jellievorm (of individuele
vorms) en laat stol in die yskas tot ferm. Keer uit
en sit voor. Lewer 6 porsies.